؛¤ّ,¸¸,ّ¤؛°`°؛¤ بيــن ثنــايــا الأيــام ¤؛°`°؛¤ّ,¸¸,ّ¤ >>>>> رواية سعودية كامله

غرفه رهف .. الساعه 2:00 مساءً
_________

** محمد **

فتحت باب غرفة رهف .. وانا مستانس .. يااربي.. سمعت صوت غلاتي الريم .. فديتها .. الله يخليها لي يارب

شفت رهف منسدحه على السرير .. قلت لها رهف رهف .. قومي كنت بقول لها تلفون بس من قلت .. تعالي تلفـ....

قاطعتني وقالت : نايمه نايمه

طلعت من الغرفه .. قفلت الباب ..ونزلت طيران للريم .. مسكت سماعة التلفون .. وقلت لها :الريم ..

قالت لي بسرعه ونبرتها فيها الخوف : نعم .. وين رهف .. وينها

قلت لها : نايمه ..

بس اللي استغربت منه .. انها ساكته ماقالت لي شي .. قلت لها الوو اكثر من مره بس هي ساكته ..

فجأه سمعت صوت بكي .. قلت لها وانا خايف عليها : الريم .. يا الغاليه .. تبكين

قالت لي وصوتها كله بحه : محمد ..لو صدق انا غاليه على قلبك .. بتخليني اكلم رهف .. تكفى محمد .. الله يخليك ..( وزادت في البكي ) .. ابي اكلمها .. لو ماكلمتها اليوم .. بمووت .. وربي خايفه عليها .. تكفى ..

بصراحه كسرت خاطري .. بيني وبينكم .. اصير مجنون .. وغبي .. لو ماخليت رهف تكلمها الحين ... لو اجيبها من شعرها عشان تكلمها .. ما اتحمل اسمع الريم تبكي ..

قلت لها : والله الحين اجيبها لك يا الريم .. بس انتي لا تبكين عشان خاطري

وش عشان خاطرك انت .. يا الثور .. يا الدرج .. يا الحطبه .. مسوي تمون على البنت انت ووجهك

قالت لي بصوتها الناعم : تسلم محمد .. يللا انا انتظرك

قلت لها ولأول مره احس نفسي حنون : انتي الحين روحي غسلي وجهك .. وارتاحي .. وانا بخليها تكلمك .. بعد شوي

ردت علي بسرعه : لا انا ابي اكلمها الحين

قلت لها : يللا عاد ريوم بلا عناد وروحي غسلي وجهك وارتاحي

عضيت على شفايفي ..لا بالله هالثور صدق نفسه ..وش فيني انا ..زودتها ..وطيحت ابو الميانه ..قالت لي كلام ماسمعته .. لاني ما كنت معاها

قلت لها : هااه .. نعم وش قلتي ضحكت علي وقالت : ولا شي .. ,, وكانها قالت بهمس اللي ماخذ عقلك يتهنابه .. اذا ماكنت غلطان عاد ,,

قلت لها الله معاك وقفلت وهي ماتدري .. انها هي اللي ماخذه عقلي .. بس حسيت الريم مرتاحه لي وهي تكلمني .. ان شاء الله اللي احسه صح .. والحين .. انطــــــــــــــــــلاق الى غرفة رهف .. اللي لو ماطاعت تجي بجيبها بالقووه .. تفدا الريم مية رهف

.....................................

_________
غرفة رهف الساعه 2:25 مساءً
_________

** رهف **

بسم الله الرحمن الرحيم .. وش فيه هذا .. فاتح علي الباب كذا .. هذا الشيطان بعينه .. صدقوني الشيطان
وقفت له وانا متخصره .. نعم وش عندك داخل علي كذا

قال لي وهو مبتسم ونازل على الارض مثل اللي راكع وماد لي يده : هيا بنا يا الاميره سندريلا ..
الى الملكه سنوايت انها تنتظرك في القفص الذهبي

بصراحه ضحكني مو بس ضحكني الا موتني ضحك شكله كان يضحك قلت له وانا اضحك : هههههههههه وش جالس تخربط

قال لي وبدا يصير جاد : تعالي كلمي الريم تبيك في التلفون

لفيت عنه وقلت له ما ابي اكلم احد ..لا تلوموني لاني ما ابي اكلم الريم .. بس وش اقول لها .. لا سالتني ليه غايبه وش اقول .. انا ماتعودت اخبي على الريم .. بس الا هالموضوع .. ما ابيها تعرف عنه شي

قال لي محمد ولأول مره يترجاني : يللا عاد رهف .. لا تصيرين كذا .. هذي صديقتك .. يللا يللا

مسك يدي وطلعني من الغرفه .. كان ينزل الدرج بسرعه .. وصلنا للتلفون .. دق لي رقم بيت الريم .. ناظرته وانا رافعه حاجب .. ما شاء الله .. حافظ الرقم بعد

ضحك علي وكانه تفشل .. طنشته .. من اول رنه .. ردت علي الريم .. قلت لها بصوت متقطع : ا ا ا ال الووووو

قالت لي : رهف .. رهووفه حبيبتي .. مو مصدقه اني اسمع صوتك .. فديتك وحشتيني .. وحشتيني موووووووت

ماتتصورين شكثر مشتاقه لك .. الوووو .. الووو رهوفه وينك .. معي

مدري ليه حسيت ان العبره خانقتني .. حسيت نفسي قاسيه .. ليه ماكلمت الريم من اوول .. قلت لها : وانتي بعد وحشتيني .. والله مدري وش فيني جلست ابكي .. مثل البزارين .. ابكي بصوت عالي .. والغريب ان الريم .. جلست تبكي معي .. انا وهي ليه جالسين نبكي الحين ؟؟ ابي افهم ليه ..!!؟؟

ناظرت اخوي محمد كان يناظرني وعيونه مفتوحه بقووه .. اخذ السماعه من عندي .. وسمع الريم تبكي .. بنفس الطريقه ..قال لي وهو مستغرب : رهف .. استخفيتي انتي وصديقتك .. الحمد الله والشكر .. ليه تبكون كذا ؟

ايه صح .. صادق حمود .. انا والريم ليه جالسين نبكي كذا .. حبيت اقطع سنفونية البكي هذي ..

وقلت لها : اخبار المدرسه ريوم

قالت لي وهي تبكي : ما تسوا شي من دونك يا الغاليه

قلت لها : تسلمين .. فديتك الريم .. والله وحشتيني

سالتني السؤال اللي كنت متوقعه ينطرح علي : ليه غايبه كل هالفتره

وش اقول وش اقول ياربي ايه قلت لها : سنوني كانو يعوروني .. عشان كذا ماكلمتك .. ماكنت اقدر اتكلم .. وطول الوقت منسدحه على ذاك السرير

قالت لي بحزن : انا اعرفك يا رهف اكثر من نفسك .. ان شاء بس ما يكون السبب قوي

كنت عارفه انها مابتصدقني .. صداقتنا مو من يوم ..او شهر ..او سنه .. صداقتنا من الطفوله ..ونفهم بعض .. بدون مانتكلم

جلست اكلمها تقريباً ساعتين ..غريب .. مو الغريب اني كلمتها ساعتين .. لان حنا نكلم بعض اكثر من ساعتين .. الغريب في الموضوع .. ان اخوي محمد طول هالساعتين وهو مقابلني .. اضحك ضحك معي .. انقهر ينقهر معي .. سلامات .. وش فيه هذا .. تو الاحظه تصدقون .. اقول لكم هالبيت كلهم مجانين ماصدقتوني

قفلت من عندها وناظرت اخوي محمد وانا رافع حاجب : محمد انت هنا ( مسويه نفسي تو انتبه له(

قال لي : جالس اشوف التلفزيون

ناظرت التفزيون كان حاط.. mbc3 .. او بالاحره اخوي سعد هو اللي حاطها .. الظاهر حطها وراح .. معقوله محمد يشوف افلام كرتون .. العب غيرها يا حبيبي .. مشيت عنه .. ماحبيت اسولف معه كثير .. اصلاً مفروض انا ما اكلم احد في هالبيت على السوات اللي سووها فيني

*
*
*
*
*
*
*

اليوم الخميس .. تذكرون قلت لكم يوم الخميس .. ملكتي .. اي وحده مفروض تكون فرحانه في هاليوم .. كنت احسب اني بقدر ارفض .. اقدر اسوي اي شي .. بس لازم ارضا بالامر الواقع .. غمضت عيوني

وفتحتها الا وانا

*
*
*
*
*
*
*

..............زوجة السيد مشعل ولد عبد العزيز

صار كل شي بسرعه .. والدمعه في عيوني .. قال لي اخوي محمد .. بيدخل مشعل الحين بيجلس معي شوي .. مارديت عليه وكنت جالسه .. بالمجلس

......................

__________
بيت ابو يوسف .. المجلس .. الساعه 9:00 مساءً
__________

** مشعل **

كنت انا في الصاله .. اسلم على ابو يوسف .. لاني بدخل المجلس بجلس معاها شوي وبطلع ..كنت اناظر في البيت .. احسه صغير .. كيف قادرين يعيشون فيه .. جداً بسيط وعادي .. مو اول مره اشوفه ..جيته كذا مره .. بس مادققت فيه .. اصلاً انا وش يهمني فيه .. من اخذ البنت من هنا .. ماراح اجيه ..دخلني محمد المجلس وراح .. قفلت الباب وراي .. وانا اناظر .. طاحت عيني عليها .. رفعت راسها .. ونزلته بسرعه .. مدري ليه ابتسمت .. معقوله هذي زوجتي ..توقعتها على الاقل اكبر شوي ..بس حلوه .. جمالها مو طبيعي .. خلوني اوصفها لكم .. بشرتها بيضا مره .. شعرها اسود طويل .. لو وقفت يوصل تقريباً .. امممم لنهاية ظهرها .. رشيقه .. لا او اقول لكم ضعيفه .. كم وزنها هذي لازم اسالها .. لابسه فستان وردي ناعم ..وحاطه ورده ورديه على شعرها .. وفاكته .. لحظه عيونها مدري كيف او وش لونهم .. تقربت منها .. وجلست

قلت لها : السلام عليكم

قالت لي شي بهمس ماسمعته .. امممم الظاهر ردت السلام .. شكلها مره تستحي .. ايه لون عيونها اسود ..وعيونها واسعه تجنن .. وجهها مو مثل جسمها ضعيف .. لا فيها خدود .. بصراحه هالبنت على ذوقي ..يجوز لو ما اخذتها انا .. ياخذها غيري وهي بهالعمر .. لان جمالها ماينوصف

حبيت اسولف ابي اسمع صوتها قلت لها : ان شاء الله اقدر اسعدك .. بحطك بعيوني .. وبعيشك في بيتي ملكه

ماردت علي .. يمكن ماعندها رد لكلامي

قلت لها : اخبار الدراسه معك

ماردت بعد ..وش فيها ماتتكلم .. لو جدار بجنبي تكلم

قلت لها وانا مبتسم : طبعاً انا ما ابي عرس .. باخذك على طول

انتظرتها ترد مافيه رد .. حطيت يدي على راسي .. مو عارف وش اسوي .... لا يكون بنتهم هذيلا ماتتكلم .. غشوني وما قالولي .. اصلاً هي حتى لو كانت ماتتكلم .. باخذها يعني باخذها

قلت لها : والدراسه مايحتاج تكمليها .. قبل حتى لا اكمل كلمة تكمليها

قالت لي وها فاتحه عيونها : لا دراستي انا ابي اكملها ..لو على موتي

ابتسمت .. عرفتك يا رهف من اي نوع انتي .. شي يخصك ماترضين عليه .. نزلت راسها مستحيه

قلت لها : زين وش تدرسين انتي

قالت لي وهي مستحيه بصوت خفيف اقرب الى الهمس : ثالث ثانوي

ماقدرت امسك ضحكتي انفجرت من الضحك .. ما اتخيل نفسي .. مشعل انت متزوج بنت اصغر منك بـ 12 او 13 سنه .. تصدقون تو احسبها جلست اضحك بدون توقف

.......................

** رهف **

قليله عليه كلمة وقح .. لا وقليل ادب بعد .. وش اللي يضحك .. اضحك على حالك انت .. اللي خاطب بنت اصغر منك بـ 13 سنه .. حمااااااااار .. ابي اعطيه كف .. قاهرني .. شوفوا وشلون يضحك .. كانه جالس مع واحد من الشباب مو خطيبته اللي اول مره يشوفها .. بالله الحق مع مين .. قولولي .. مو يستاهل كف ..

وقف ضحك وقال لي : سووري .. بس تذكرت شي ضحكني .. وضحكت

تذكرت شي .. هااه يا استاذ مشعل يا ولد عبد العزيز .. وين اصرفها ذي

لفيت عنه عطيته ظهري .. لفني وقال لي : زعلتي

هه مشكله عاد اللي يقطون الميانه من اول يوم .. هين .. انا اوريك يا مشعل بردها لك

وش رايكم اوصف لكم شكله .. طويل طويل طويل طويل .. بس ضعيف .. وربي ما اعطيه عمر 30 سنه لو ماقالولي يمكن مادريت .. شكله كانه بعمر اخوي يوسف يعني 27 سنه .. شعره بني .. عيونه لونها عسلي .. بس ماعجبني ابداً

وقف باس راسي .. وقال لي خلي بالك من نفسك .. وطلع .. جلست اناظره وهو يطلع .. وانا مو متخيله حياتي الجديده كيف راح تكون مع مشعل

^*^
/
\
/
\
/
\
/
\
/
^*^

***** نهاية الجزء الثالث *****

وانتوا كيف تتخيلون حياة رهف مع مشعل ؟؟

ووش ينتظر رهف في بيتها الجديد ؟؟

كيف راح تكون ردة فعل خالد والريم من هالزواج ؟؟

كل حبي .. صاحبة الكلمه
...:::][ الجزء الرابع ][:::...
__________
سيارة مشعل ..الساعه 9:00 مساءً
__________

** رهف **

كنت بسيارته .. ودعت بيت اهلي .. مدري ليه احس اني مودعته لمده طويله ..ماكنت ابي اجلس معاه قدام .. عشان كذا حمدت ربي .. ان ولد عمته كان معانا وجلس قدام .. حسيت برتياح اكثر وانا جالسه ورا .. المهم وصلنا ما اقدر اوصف لكم .. شكثر الفله كبيرررره .. كبيره بشكل مو طبيعي .. ما اتخيل نفسي عايشه هنا .. معقوله بعيش فيه بس هو وبنته
فتح لي الباب وقال لي تفضلي .. نزلت .. حديقته كبيره وتجنن .. دخلنا البيت .. جلست اناظر .. كان شكله فخم ويجنن .. سالني : وش رايك في البيت

قلت له : عادي

مدري ليه قلت له عادي .. مع انه مو عادي .. ماحبيت يقول اني احب هالاشياء .. وانا فعلاً .. هالاشياء ماتهمني

جات بنته تركض .. وحضنت ابوها .. البنت بصراحه تهبل ..بس غريبه .. الظاهر امها ماكنت سعوديه .. عيونها لونها زرق .. شعرها اشقر .. وبيضا مره .. بنفس درجة بياضي تقريباً .. بس حلوه البنت .. ناظرتني بنظرات حقد

وقالت : الحين هذي العروس الجديده .. وعععع .. امي احلا

قال لها بسرعه : رغد .. عيب .. روحي غرفتك

اسمها رغد يعني .. لسانها يبي له قص .. صدق قليلة ادب مثل ابوها

لف علي وكان منحرج : اسف رهف .. بس تعرفين بنت صغيــ.. قاطعته وقلت له : لا لا عادي .. ماتهموني

يووه كاني قلت شي غلط .. (( ماتهموني )) .. عدلتها وقلت له وانا مبتسمه : أأأ قصدي ماتهمني ..

لاني عارفه انها صغير وكذا

هز لي راسه وقال للشغاله تدلني غرفتي .. رحت الغرفه اللي دلتني عليها .. كانت حلوه وفخمه .. لونها تقريباً بني وبيج ..قلت للشغاله ترتب اغراضي في الدولاب .. اخذت جوالي ودقيت على الريم

ردت علي الريم وهي مقهووره : انا ما اكلمك وشوله داقه علي

قلت لها وانا اضحك : هههههههه ليه عاد

قالت لي : وش فيك على الغياب انتي .. كل يوم والثاني غايبت لنا .. ماكنتي كذا السنه اللي فاتت

قلت لها وانا ابلع ريقي : غبت اليوم لاني لاني تزوجت

........................

___________
بيت ريم .. الساعه 9:45 مساءً
___________

** خالد **

كنت جايب كتب للريم من المكتبه .. وانا راكب الدرج كنت ااتذكر رهف .. اللي وحشتني موووووووت

ماتدرون شكثر واحشتني هالبنت .. وادندن ..

علمني وشلون أنساك وأنام

وأنا اللي لك صاحي أيام وأيام

شاغلني في بالي شوقك ولا يروح

صاحي أنا ونايم ما يروح ما يروح

وصلت لغرفة الريم ..الا وهي تقول ..طيب رهف .. لا تقطعين .. مو عاد تنشغلين بحياتك الجديده .. وتهملين الدراسه

هههههههههه طيب .. اوكي ولا يهمك .. على خير ان شاء الله .. مع السلامه

لفت علي وهي تقول : والله هالدنيا غريبه .. من جد غريبه .. اجل رهف .. تتزوج زواج سريع وانا اخر من يعلم

لا مستحيل .. هذي وش جالسه تقول .. تبي تموتني .. تقدمت منها ومسكتها وانا اصرخ في وجهها : كذااااااااااااااااااابه .. انتي كذااااااااابه

قالت لي وهي مستغربه : خالد .. جنيت وش كذابته اتركني .. وليه عاد كل هالانفعال .. وش فيك

قلت لها : الريم .. ( واخذت نفس ) .. رحم الله والديك .. قولي لي وش السالفه .. لاني مو فاهم شي

ناظرتني شوي وقالت لي : زين اتركني .. وبقولك

ايه صح نسيت اني كنت ماسكها .. تركتها وقلت لها .. وانا امسح بشعري على ورا : طيب يللا قولي

قالت لي وهي تبتسم ابتسامة خوف : رهف صديقتي .. بنت جيرانا ابو يوسف .. تزوجت امس

حسيت اني ابي ابكي .. بس مابكيت .. كيف تتزوج وانا احبها وهي تحبني ومن هذا اللي ماخذها ... اخذت نفس طويل .. وقلت لها : لا .. اها .. ايه .. ومن هذا اللي تزوجته

قالت لي : صديق اخوها يوسف .. كل شي صار بسرعه .. وابوه متوفي .. وماسوت عرس .. وما مداها تقول لي .. مو مصدقه .. الظاهر انا بحلم .. معقوله رهف تزوجت ..

اذا انتي مو مصدقه .. اجل وشلون انا اصدق .. قولولي بس وشلون

كانت هي تتكلم .. مشيت وقفلت الباب .. الظاهر كانت تناديني .. بس مالفيت عليها .. رحت غرفتي .. دخلت وقفلت الباب بالمفتاح .. وانسدحت على سريري .. راحت مني رهف بهذي السهوله .. راحت ملكة القلب والاحساس كله .. وانا وين اروح .. وش اسوي .. احبها من يوم كان عمرها 15 .. كله منك يا خالد .. تنتظرها تخلص ثانويه عشان تخطبها .. كان خطبتها الحين .. طاحت دمعه من عيوني .. دمعه كلها حسره وقهر والم .. حطيت يدي تحت المخده .. طلعت البطاقه .. تذكرونها .. البطاقه اللي اعطتني اياها رهف ..في السياره .. وفتحتها .. جلست اقراها .. قفلتها .. وطلعت من غرفتي .. وطلعت من البيت مره وحده .. مدري وين اروح بصراحه .. بس اهم شي اطلع

...................................

_____________
بيت مشعل .. الساعه 7:30 صباحاً
_____________

** رهف **

صحيت من النوم .. ناظرت بجني .. كان مشعل مو موجود.. قمت من السرير .. دخلت الحمام ( اكرمكم الله ) .. شوي وطلعت .. لقيت مشعل مو موجود بالغرفه .. شفت الفطور على الطاوله .. وفيه مع الفطور ورقه .. اخذتها .. وفتحتها .. كان مكتوب فيه :

^*^
/
\
/
\
/
\
/
\
/
^*^

رهف .. انا عندي شغل .. ما راح افطر معك اليوم .. ان شاء الله اجي على الغدا

^*^

فتحت عيوني بقوه .... وحطيت يدي على خصري ... ياسلام .. يقول قسم .. اصلاً هو من متى يفطر معي .. من اول ماتزوجت للحين صار لي اسبوعين .. مافطر معي .. الا 3 مرات .. تركت الورقه .. ورحت صليت .. قريت قرآن شوي .. وبعدين قمت .. جلست على السرير .. وش اسوي ماعندي شي .. طفشانه .. البيت كبير وفاضي .. واليوم خميس .. مافيه مدرسه .. ولو طلعت اشوف التلفزيون .. بشوف رغد بنته .. وهي ماتدانيني .. الاحسن ما احتك فيها .. خليها بقلعتها .... الا وش اخبار خالد .. للحين يتذكرني .. مانساني ..وبعدين انا متزوجه وش يهمني فيه .. بدق بيت ريم يمكن هو اللي يرد على الاقل بسمع صوته .. مسكت التلفون .. ودقيت الرقم .. ******** .. وجلست انتظر احد يرد .. ردت علي اختها نوره : الوووو .. الووووو .. قفلت بسرعه .. صح اليوم الخميس .. تجيهم نوره من الصبح .. رحت فتحت الدريشه .. الهوا طير شعري على طول .. فكرت بحياتي مع مشعل .. حياة عاديه جداً ..ما اشوفه الا قليل .. دوم بشغله .. وكانه ماخذني غصب .. صدقوني ما يبيني .. مايواطني في عيشة الله .. قليل اذا سولف معي .. وماوداني بيت اهلي الا مرتين .. واذا رحت بيت اهلي اطفش بعد لان ابوي يلح فوق راسي .. خلي مشعل يكتب البيت بأسمك خليه يعطيك مزرعته هديه وخليه وخليه .. واخاف يروح يقول لمشعل هالكلام ويحرجني معه .. لان بيقول اني احب الفلوس وطمعانه فيه .. ان شاء الله .. يارب .. ماتستمر حياتي على هالحال .. ويطير الا انا فيه .. مثل مايطير الهوا شعري الحين .. الله .. الجو حلو .. بطلع بره الحديقه ..,, قفلت الدريشه .. وطلعت من غرفتي .. نزلت الحديقه .. الله الجو مره حلو اليوم .. تمشيت شوي

شفت رغد بنته .. تلعب كوره .. جلست اناظرها وهي تلعب وابتسم ..,, ..فجأه جات الكوره بالغط بجنبي .. نزلت لها ابي اخذها ..

صرخت علي : لاااااااااااا تمسكين كووووورتي

بسم الله الرحمن الرحيم .. وش فيها ذي .. ضليت على وضعيتي كذا .. وانا اناظرها .. تقدمت مني .. وهي عاقده حواجبها .. وقالت لي : اسمعي انتي .. اشياء تخصني ما ابيك تلمسيها .. وحتى الاشياء اللي ماتخصني .. لا تحسبين عمرك ملكة هالبيت .. تره هالبيت بيتي .. انا وابوي .. وانتي موقعك غلط هنا

اقول لكم وش فيها ذي .. بزارين اخر زمن من جد .. والله لو وحده غيري .. اخذت الكوره .. ورمتها فوق راسها .. بس انا مكبره عقلي ..وقفت و قلت لها : حبيبتي كنت بجيب لك الكوره

قالت لي : انتي اقوووول .. خذي نفسك .. وارجعي بيتكم .. بيت المنتفين .. احسن لك

قهرتني .. عصبتني .. من وين جايبه هالكلمه .. بيت المنتفين .. اصلاً هي بزره .. ماتدري انا بنت من .. ولا وين عايشه .. هذا اكيد مشعلوه قايل لها هالكلام .. لكن انا اوريك انتي وابوك ,, تقربت منها .. مسكت وجهها بيدي .. ورفعته بقووه ..صرخت عليها : اسمعي بلا قلة ادب ..هذي اخر مره .. اسمح لك تتكلمين معي بهذي الطريقه انا اكبر منك احترميني .. فااااااهمه

.......................

يسلمووو

ارجو التكمله

يسلمووووو
كمل

الله يعطيك العافيهـ

مشكوور

يلااااااااااا تكلمة الرواية

يسلموووو عالموضوووووووووووع

تـسـلـم يـمـيـنـك

ارجو التكمله

تـحـيـاتـي (((السندباد)))